f Tata Ibadah HKBP - PARNINGOTAN DI HAMAMATE NI TUHAN JESUS DOHOT MARULAON NA BADIA - hkbp.lagu-gereja.com | Lagu gereja HKBP | BUKU ENDE NOT ANGKA
Buku Ende, BN (Buku Nyanyian HKBP, Suplemen Buku Ende, Lagu KOOR HKBP, Katekhimus Kecil
hkbp.lagu-gereja.com
 
Jamita HKBP Minggu, 21 Juni 2026 - Pemeliharaan Allah Yang Universal - Kejadian 21:8-21
# I. Latar Belakang Teks, II. Allah Memelihara Orang yang Tidak Diperhitungkan Manusia, III. Allah Bekerja Melampaui Batas Suku, Bangsa, dan Status, IV. Allah Menolong Pada Saat yang Tepat, V. Allah Memiliki Masa Depan bagi Setiap Orang,
View : 6124 kali

Download MP3 Music
Tata Ibadah HKBP
Jumat, 03 April 2015

Tata Ibadah HKBP - PARNINGOTAN DI HAMAMATE NI TUHAN JESUS DOHOT MARULAON NA BADIA
PARTURE NI PESTA PARNINGOTAN
DI HAMAMATE NI TUHAN JESUS
DOHOT MARULAON NA BADIA
HKBP RESSORT PONDOK GEDE

Jumat, 03 April 2015

PUKUL 06.00 WIB

DAN PUKUL 10.00 WIB









Topik :
Bagasna i Hamoraon, Hapistaran, Parbinotoan ni Debata
(Rom 11: 33-36; 12: 1-8)






Jl. Perumahan Taman Pondok Gede Blok H No.1-3
Pondok Gede RT 04 RW 01 Kelurahan Jatirahayu
Kecamatan Pondok Melati Kota Bekasi
Provinsi Jawa Barat
Telp. (021) 8467284



01. Pangaradeon.

·   Parhalado mangarade panghobasion di Bilut Parhobasan.
·   Huria mangarade pahohom diri ma diingananna be.
·   U=Uluan            H=Huria


02. Joujou tu parsaoran dohot Debata.

       U:    Hamuna angka dongan sahaporseaon, namarpungu do hita nuaeng di Gareja on laho patupahon Pesta Parningotan di Hamamate ni Tuhanta Jesus Kristus. Andorang sotapungka pestanta, tangkas do ingkon taparade rohanta, pingkiranta dohot sandok ngolunta laho marningot habebernit ni sitaonon ni Jesus di hau napinarsilangi siala ni dosa ni saluhut jolma, ingkon manaon Ibana siala dosa na so tumanda dosa hian siala pangalaosionta di Patik ni Debata. Naeng nian targorga turohanta bernit ni na tinaon ni Jesus i asa unang be taulahon mardosa. Undukhon ma saluhut pambahenanmu nahurang i, jala taendehon ma ende on sian nasa rohanta:
              (Mangendehon BE. No. 84: 1 ) Aut na ginorga tu rohangku  Bl. 195
              Aut na ginorga tu rohangku, bohiM di na lao mate Ho
Aut na huingot o Tuhanku, tongtong pangkophopMi di au
Ai Ho do paluahon ahu, dosangku do pinorsanMi
Didaoni Ho parsahitonku, martua au binahen ni i.
---------------saat teduh----------------
              Tabongoti ma tingki parsaoran dohot Debata, ita uduti ma mangendehon Buku Ende No. 86: 1-3  Silang na badia
        

03. Marende BE. No. 86: 1-3  Silang na badia          Bl. 67

1.    Silang na badia i, Ho do lombulombungki.
     Maralohon dosa i, dohot pandelean i.
     Di sude sitaonon i, Ho ma lombulombungki.

2.    Nasa na huula i, ndang tau hasonanganki.
     Nang ringkot pe rohangki, pola ro nang ilungki.
     Holan asi ni rohaM, pangurupi o, Tuhan.
                      ..................musik.................. (jongjong

3.  Ro do au nuaeng tu Ho, sai palambas ma rohaM.
     Nunga pola mate Ho, ala asi ni rohaM
     Jangkon au na dangol on, sai ulosi tondingkon.


04. Votum-Introitus-Tangiang.

U:      Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia natumompa langit dohot tano on.
H:      A m e n .
U:      Sintua ni Malim sisongon i do tama di hita, na badia, na so jahat, na so marlindang, na so marbolat sian angka pardosa.
H:      Naung gabe tumimbo sian angka banua ginjang.
U:      Na so pola ganup ari songon angka sintua ni malim i mamboan jumolo pelean taringot tu angka dosana sandiri, dung i taringot tu dosa ni natorop i.
H:      Ai sahali do i diulahon, di na mamelehon diriNa Ibana
U:      Na gabe pangoloi do Kristus paima mate, pola mate tarsilang. Di dia angka soropmi, ale hamatean? Di dia pangagoonmu, ale banua toru? Haleluya.
H:      (Mangendehon) Haleluya, Haleluya, Haleluya.
U:      (Martangiang ma hita) Ale Amanami jala Debatanami! Parasiroha na sumurung do Ho di sude jolma manisia. Nunga dilehon Ho AnakMu, Tuhan Jesus Kristus Tuhannami, manaon haleaon dohot siak ni bagi, pola mate tarsilang, asa malua hami sian gomgoman ni sibolis. Sai parrohai ma hami mamingkiri panaonon ni AnakMu, asa maruli hami marhite sian i di hasesaan ni dosa dohot di haluaon sian hamatean paduahalihon, asa dapot hami hangoluan salelenglelengna marhitehite Tuhan Jesus Kristus Tuhannami, Anak haholongan ni rohaM. Amen.    -hundul-

05. Marende SDJ. No. 619: 1 Di Golgata

1.                  Di Golgata husolsoli do sude dosangku na jorbut i.
Ias au dibaen mudarNa i, puji Jesus i.
Puji ma GoarNa, puji mudarNa, paias rohangki puji Jesus i.

06. Patik Ni Debata :

U:      Tangihon hamu ma patik ni Debata! I ma sian Buku Panurirang Jeremia 9:22-23; Songon on do hata ni Jahowa: Sai unang ma ditengahon na bisuk habisukonna, sai unang ma ditengahon na gogo hagogoonna, sai unang ma ditengahon na mora hamoraonna. Manang ise na naeng mamuji dirina, on ma dipujihon: Na marroha i ibana, jala na tinandana i ahu, ai ahu do Jahowa, parasi roha na mangkajongjongkon uhum dohot hatigoran di tano on, ai angka ido lomo ni rohangku, ninna Jahowa. . Antong, rap mangido gogo ma hita tu Debata!
U+H: Ale Tuhan Debata, sai pargogo i ma hami mangulahon na hombar tu patikMi. Amen.


07. K o o r  :   06.00 WIB Parompuan
                        10.00 WIB Ina Hanna
            
08. Marende BE No. 78: 1     O, Ulu na sap mudar  Bl. 158 (jongjong)

1.    O ulu na sap mudar  binaen ni bugangMi.
Na sian jangarjangar sisungsang duri i.
O ulu hatongamon hian do tumpalMi.
Ditaon Ho haleaon Ho naeng sombaonki?
              
09. Tangiang Manopoti Dosa.

U :       Tatopoti ma dosanta! Ale Amanami jala Debatanami, na di banua ginjang, Pargogo na so hatudosan ! Pardengganbasa do Ho, jala ro di salelenglelengna do asi ni rohaM. Sai marpamuati ma rohaM di hajahatonnami, jala sai unang be ingot angka dosanami; ai jotjot do hami mardosa maradophon Ho, jala jotjot do husungguli hami rimasMu marhite sian pangalaosionnami, di hataM,
H:        (Mangendehon BE. No. 165: 2-3 O Jesus na pangolu au) Bl. 19
            Pardosa na godang do au badia anggo Ho,
            Sai tu na roa do au lao  sai tu  na jahat do.

O Tuhan  hutopoti ma luhutna dosangki
                        Asi rohaM sai sesa ma di Ho ma tondingki.
U:        Ale Tuhan Jahowa, sai unang paingotingot pangalaosionnami, unang alang asi ni rohaM, sai urupi ma hami, Ho ale Tuhan Debata hatuaonnami, palua hami, jala sesa dosanami, ala ni AnakMu, Tuhan Jesus Kristus, Tuhannami. Amen.
H:        (Mangendehon BE. No. 86: 3 Aut na ginorga tu rophangku) Bl. 67
            Ro do au nuaeng tu Ho, sai palambas ma rohaM.
            Nunga pola mate Ho, ala asi ni rohaM
            Jangkon au na dangol on, sai ulosi tondingkon.
U:        Ala ni pangalaosionta do umbahen na tartullang Kristus, jala binahen ni hajahatonta do Ibana mabugang. Ampe tu Ibana pinsangpinsang parhitean ni hasonanganta, jala binahen ni bugangNa malum itahilala. (Jes. 53:5). Hasangapon ma di Debata na di ginjang !
U+H:   A m e n .                                                                               -hundul-

10. K o o r  :   06.00 WIB Haleluya
                      

11. Marende BE. No. 76: 2-3             Sada nama sangkap                Bl. 199

2.        Ingkon sai Ibana ingotonku, uju na tarpajal i.
Tu hau pinarsilang ginantungkon, sai mabaor mudarNa i.
Ai humophop au ditaon uasNa, asa dohot au muse upaNa.
Ai ditatap do au on, di pandokNa: "Nunga sun !"

3.           O Jesusku sai paingot ahu di dosangku di basaM.
Ai andorang di na holom ahu  dipalambas Ho rohaM.
Nunga leleng dilului Ho do au na lilu asa unang mago.
Ditaon Ho na bernit i lao manobus tondingki.         

12.     Manjaha Hata ni Debata: Epistel

          U:      Tabege ma Hata ni Debata turpuk di Pesta Parningotan di Hamamate ni Tuhan Jesus sadari on. I ma sian Buku Panurirang Jesaya 52: 13-15; 53: 1-12, tajaha ma marsorinsorin. Ida ma, pistar do pambahen ni naposongku; tarhinsat do ibana jala dipatimbo, gabe timbul situtu sogot.
          H:      Ia songon i songgot ni roha ni torop halak mida ibana dibahen hinaroa ni rupana dibahen tandina sian jolma hian, rupana pe maradophon jolma.
U:      Songon i do urasonna torop angka bangso parbegu sogot, hohom be do angka raja maradophon ibana, ai halak na so dung panahatan ni barita i, nasida do marnida, jala halak na so dung umbegesa, i do mangantusi sogot. Tung ise ma nuaeng porsea di jamitanami? Jala tangan ni Jahowa, tung ise ma naung tumandasa? Ai simbur do ibana tubu songon tumbur di adopan ni bohina,
H:      jala songon tunas sian tano na mahiang. Ndang adong hinauli ni rupana manang hamuliaonna; ia huida hami ibana, ndang adong rupana umbahen sihalomohononhon ibana.
U:      Dileai jala dipasiding jolma do ibana, baoa na somal mangae pardangolan dohot sahit ibana, pola ditabunihon halak bohina maradophon ibana, dibahen leana, jadi ndang pola hurajumi hami ibana.
H:      Tongon do angka sahitta diusung ibana, jala angka pardangolanta diporsan; alai anggo rohanta mandok: Debata do maminsang, mamungkul dohot pasipal ibana.
U:      Hape ala ni pangalaosinta ibana tartullang, binahen ni hajahatonta ibana mabugang. Ampe tu ibana pinsangpinsang parhitean ni hasonanganta, jala binahen ni bugangna malum itahilala.
H:      Luhut do hita lilu songon birubiru, ganup masitondong dalanna be, alai hajahaton ni hita sudena dihonahon Jahowa tu ibana.
U:      Dipasipal pe ibana, sai manaonnaon do anggo ibana, ndang manang mangkuling pamanganna, songon birubiru do ibana na tinogu tu pamotongan, jala songon anak ni birubiru na hohom maradophon jolma sigusting ibana, tung na so dibungka do pamanganna.
H:      Dung malua ibana sian pardangolan dohot sian uhum, tung ise ma na tuk manjujur sundutna i? Ai sirang pe ibana sian tano ni halak na mangolu, binahen ni pangalaosion ni bangsongku do mangonai pinsangpinsang i tu ibana.
U:      Rap dohot halak parjahat hian tanomanna dilehon, hape rap dohot halak na mora ibana dung mate, ala na so adong na so uhum diula jala ndang adong sipaotooto di bagasan pamanganna.
H:      Alai dihalomohon Jahowa do parsipalna mangae sahit! Ia dung dilehon hosana bahen pelean pardengganan, idaonna ma boni jala paganjangonna ariarina, jala manjadi ma lomo ni roha ni Jahowa marhitehite tanganna.
U:      Dung malua rohana sian halojaon, idaonna ma na pasabam rohana; torop ma halak pintoran ni naposongku na tigor i marhitehite parbinotoanna, jala porsanonna ma hajahatonnasida i. Dibahen i torop halak lehononku bahen jambarna, jala marbagi tabantaban ibana rap dohot halak na marhuaso, ala naung sineahonna i hosana tu hamatean, jala tarrajum ibana tu halak parjahat; ala naung ibana mangusung dosa ni torop halak, jala diondihon halak parjahat. Ido sahatna. Martua do angka natumangihon hata ni Debata jala naumpeopsa.
U+H: Amen

13. K o o r  :   06.00 WIB Wijk 2
                        10.00 WIB Mannen Ebenezer
14. Marende BE. No. 88: 1-2 Di surgo do alealenta Bl. 106

1.      Jesusku naung manobus ahu, sai naeng haholonganku Ho.
Tu dolok Golgata Ho laho, nionjar ni holongMu do.
Hupuji nasa asiMi, alai gumodang holongMi.
.............................(jongjong) .............................
2.      Tarsolsolbagi do rohangku, paidaida dangolMi.
Marningot sasude dosangku, ai i do na tinaonMi.
Hupuji nasa asiMi, alai gumodang holongMi.

15. PANGAUHONON DI SITAONON DOHOT HAMAMATE NI JESUS

       U:      Sian Gabbata i ma pantarbatu paruhuman ni si Latus, diparborhat ma Tuhan Jesus naung tinali i, huhut manetehi mudar sian pangalinsingan na di tanggurungNa i. VIA DOLOROSA, dalan haberniton na binolus ni Tuhan Jesus, manuju tu Golgatha partangkurahan hajongjongan ni Silang ni Tuhan Jesus i. Nunga gale Tuhan Jesus ala pardurus ni mudar i, hape ingkon porsanonNa dope hau pinarsilang na dokdok i, ai ingkon sahat do i sadari i tu Golgata. Asa tung haru tangkas di roha ni sude halak ise na naeng tarsilang i, disurathon hian do di sada papan "IESUS NAZARENUS REX IUDAIORUM" na somal di papendek INRI na marlapatan, JESUS NA SIAN NAZARETH RAJA NI JAHUDI. Ndang tarhatahon be las ni roha ni Jahudi, songon i sintua ni natorop i, ai nunga saut dipatunduk Tuhan Jesus i, ndang adong be alo-alo nasida didok rohana. Mulai ma gale Tuhan Jesus hira na so adong be gogoNa. Sipata tinggang nama Ibana dionjar silang na bolon i, dohot hinorhon ni samboksambok ni angka soldadu asa tung humatop nian sahat tu partangkurahan i. Ndang tarpaidaida angka ina dohot angka boruboru na dohot mangihutihut Tuhan Jesus, na masa i, marsaburan ilu nasida paberengbereng natinaon ni Tuhan Jesus i, hape so tarbahen nasida manang aha tu Ibana. Alai, diboto Tuhan Jesus do pangkilalaan nasida i, gabe didok Tuhan i ma tu nasida : Unang ma ahu tatangisi hamu, Ale Boru Jerusalem, dirimuna, anakhonmuna ma..........Ndang diriNa disarihon Tuhan Jesus, alai natorop i do. Ise nama na manarihon Ibana? Di na lam suda gogoNa, hira na so tolap be namangusung hau pinarsilang i, hape ingkon sahat do i tu Golgatha, Tuani ma topet disi si Simon na sian Kirene. Ibana nama dipaksahon angka soldadu i mamorsan hau pinarsilang i asa sahat tu Golgatha. Nanget nanget didalani sahat ma tu dolok partangkurahan i.
       H:      (Marende BE. No.78 : 1)    O ulu na sap mudar                Bl. 158
                 O ulu na sap mudar, binaen ni bugangMi. Na sian jangarjangar, sisungsang duri i. O ulu hatongamon, hian do tumpalMi,  Ditaon Ho haleaon, Ho naeng sombaonki.
       U:      Di Golgata, nunga jongjong silang ni Tuhan Jesus. Nian, adong do tolu silang naung jongjong disi, alai holan silang na di tongatonga i do na diparrohahon situan natorop, ai holan i do na marsurat. Na dua nari ndang pola diparrohahon i, ai somal do masa na songon i. Holan silang ni Tuhan Jesus i do ianggo na so hea masa, ai Anak ni Debata do na tarsilang disi. Hatop do marhobas angka soldadu mambuat tongkok dohot labang na tajom jala ganjang. Adong do nang na manghobasi tuak anggur na marsaor pogu asa adong lehononna tu Tuhan Jesus di hau pinarsilang i. Sintong ma tutu, dipanangkok ma Tuhan Jesus tu hau i, dilabang ma tangan dohot pat ni Tuhan Jesus tu hau i, dungi marpancar ma mudar ni Tuhan Jesus sian pangalabangan i. Tontu hansit jala maniak mai dihilala Tuhan i. Tung so tarhatahon do tahe hinabernit ni partinaonan ni Tuhan Jesus i.

       H:      (Marende BE. No.78: 3) O ulu na sap mudar                    Bl. 158
                 Au on tama o Tuhan, manaon na tinaonMi. Dosangku do diporsan Ho na tarsilang i. Sai tatap ale Tuhan, au na dijoloMon. Huhut sai patuduhon, basaM tu rohangkon.
       U:      Nunga lam nangkok mata ni ari, lam maniak ma dihilala Tuhan  Jesus na targantung i, di pamilngas ni mata ni ari i tu bugang pangalabangan na di tangan dohot patNa i. Alai, aha ma sipatupaon ni namanghaholongi Ibana nunga saut targantung Tuhan Jesus Anak ni Debata i. Padomu hita jolma tu Debata do i. Sude do na dohot ro tu inganan pamajalan ni Tuhan i masidok hatana be huhut mangupirhon uluna be laho pauru-uruhon Tuhan Jesus. Pe, Ho na pajongjonghonsa dibagasan tolu ari .... Palua ma antong diriM sian i .... angka songon i do dipandok nasida tu Tuhan Jesus na targantung i. Nang angka soldadu i pe, mansai ragam do dipandok nasida tu Tuhan Jesus naung targantung, na so tagamon be boi mangalo i. Dibuat nasida ma abit ni Tuhan Jesus laos dibagi bagi nasida hombar ru parbagina di roha nasida. Ndada holan halak na jongjong disi na mangaleai Ibana, dohot do nang halak na targantung dilambungNai mangungkap pamanganna tu Tuhan i. Nasada mangaleai, alai ianggo nasadanari diparhatopot do, na sintong Tuhan Jesus i Anak ni Debata. Laos dipagomgomhon do dirina tu Tuhan i ai didok do : "O Jesus, ingot ahu ia dung sahat Ho tuharajaonMi".
       H:      (Marende BE. No. 82: 3) O, Jesusku tu bugangMu           Bl. 21
                 Tu tanganMu ma tondingku, jumpa hamamatengki.
                 Tu lambungMu, o Tuhanku, alap na tinobusMi.
       U:      Nang pe naung gantung Tuhan Jesus di hau pinarsilang i, marsoara dope Ibana sian i, patubegehon angka hata na tau mangapuli dohot papirhon tondi ni naumbegesa, jala na porsea tu Ibana. "Ale Amang, marpamuati ma rohaM mida nasida, ai ndang diboto nasida nabinahenna i .....". Mangondihon halak na mamajalhon Ibana do hata i mangondihon tu Debata Amana na di Surgo i. Nang pe naung gantung Ibana di hau pinarsilang i, alai ianggo ulaon parpangondian i ndang namansohot sian Tuhan i. Nian, nda tung na so diantusi namamajalhon Ibana i, aha naniulana i, alai holan ala ni holong ni roha ni Tuhan Jesus maradophon hajolmaon on do umbahen diondihon na mamajalhon Ibana i. "Situtu do hatangkon tu Ho, sadarion do ho rap dohot au di paradeiso .....". Hata on do na gabe apul-apul tu parjahat na di siamunNa na tarpajal i, alai naung  marhatopothon Tuhan Jesus Kristus Anak ni Debata. Laos hata na mangonai tu hita ma on, ia na olo hita paubaroha dung taparhatopot Tuhan Jesus na targantung di silang i ala ni dosanta, gabe muba hita. Nang pe targantung Tuhan Jesus, mardalan do pengampunan jala taruli do angka na rap dohot Ibana. Ala ni i do, ingkon sian nasa roha ni naporsea i do mangendehon : "Sonang di lambung Jesus, sonang na ro tusi, Unang be ho mabiar laho mandapothon i ....". Sai olo ma hita ro tu lambung ni Tuhan Jesus, ai hasonangan do disi. "Ndi ma inang anakmi ......, Ndi inangmi .......". Diihuthon si Maria do anakna i sahat ro di hau pinarsilang di Golgatha i. Diida Tuhan Jesus do inangNa i disi, laos didok do tu inangNa si Maria i .... Ndi ma inang anakmi, huhut dibereng dompak siseanNa na adong disi. Laos didok tu siseanNa i huhut dibereng tu inangNa si Maria ......, Ndi ma inangmi. Sada do sangkapNa mandok i tu nasida, ima asa marsada jala marpasaoran nasida angka na mangihutihut Ibana sahat tu Golgatha i, ido nahinirim ni Tuhan Jesus  sian nasida, laos songon i nang sian hita na mangihutihut Tuhan Jesus tu Golgatha marhite parningotan on. "Eli, Eli Lama Sabachtani...... Ale Debatangku, Debatangku, boasa tadingkononMu ahu......?", ala lam leleng lam hansit dihilala Tuhan Jesus na gantung di Silang i. Hira na ditadingkon Debata Ibana hinorhon ni hansitna. Alai asing do pangantusion ni natorop i di Hata ni Tuhan i, na manjou si Elias do i didok nasida. Hape na mansoarahon tu portibi on do Ibana poboa na mansai hansit do molo nunga ditadingkon Debata. Ala ni i, patut mabiar nian jolma manundalhon Debata. Mansai mohop panghilalaan ni Tuhan Jesus hinorhon ni bugang i, jala mudar na di dagingNa i nunga laho habis, patut do mansai mauas dihilala Tuhan Jesus. "Mauas Ahu ......" ninna Tuhan Jesus. Nda Ibana do na hea mandok : manang ise na mauas, tu Ahu ma Ibana ro. Jala laos Tuhan i do na hea manoarahon : "Batang aek na mangolu do mabaor sian naporsea di Ahu....." hape ingkon Ibana ma muse mandok jala manjouhon sian Hau Pinarsilang i, "Mauas Ahu". Dung hira naung lam sidung dihilala Tuhan Jesus ulaonNa na taringot tu partondion dohot pardagingon marhite sitaononNai, naeng ma auhohonNa i marhitehite na paujunghonsa di hau pinarsilang i, ai adong do hagogok ni pangoloionNa di tona ni Debata AmaNa.
..........hohom sangombas - detik terakhir..........
"Marsoara na gogo ma Tuhan Jesus, mandok : "NUNGA MARUJUNG .....". Dipatungki Tuhan Jesus ma simajungjungNa, jala dijouhon ma "Ale Amang ... tu bagasan tanganMu ma hupasahat tondingKu ....." Dungi...... TOS MA HOSANA.
.............. huria jongjong ..............
         (mangkuling ma giringgiring pitu (7) hali huhut diiringi Musik   mangendehon BE. No.449: 1-2  Sai solhot tu silangMi Bl. 300)     
..........saat teduh..........
U:      Nunga mate be Tuhan Jesus. Nunga marujung be dibahen ulaon  panghophopon Na i di hau pinarsilang i. Aha ma muse namasa??? Masa  ma haholomon di sandok tano on, maribak hirehire na dibagas joro i, mabola dua sian ginjang tu toru, humutur jala humuntal ma tano i, jala mungkap ma angka tanoman, hehe do angka nabadia i. Ndang tarjua so dohonon ni Opsir namarjagai: TUTU DO HALAK ON ANAK NI DEBATA". Dung bot ari, ro ma si Nikodemus dohot si Josep na sian Arimatia mangido bangke ni Jesus, asa denggan dibandahon, disahapi dope i jala dijaga. Ia hinaparir dohot dangol ni natinaon ni Jesus i, ise ma na tuk mangkilala jala holong ni rohaNa i, ise do tuk mandodo i? Nda ingkon songon i Kristus i asa bongot ibana tu hasangaponNa i? Didok Jesus dope: Dosam dohot dosa ni portibion do nahuporsan, manggarar i tu Debata! Asa rap AHU dohot ho ro di pinomparmu di hasonangan di lambung ni Debata ..... i do natinaon ni Tuhan Jesus Kristus. Antong itatangisi ma dosanta dohot dosa ni ianangkonta, jala tahatindanghon ma Ibana naung mate jala mulak mangolu, hundul di siamun ni Debata laho mangondihon hita. Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:
U+H: Ahu porsea di Debata Jahowa.......................                   (hundul)

16. K o o r  : 10.00 WIB Ama
17. Sunggulsunggul
18. K o o r  : 10.00 WIB Wijk 1
19. Marende BE. No. 81: 1 ......... Jesus mual ni ngolungku Bl. 185
            (Papungu Pelean I - II)

1.      Jesus mual ni ngolungku, Sipangolu tondingki.
Ai dibunu Ho musungku, i ma hamatean i.
Ho manaoni hamagoan, patupahon hangoluan,
Alani hupuji Ho, tung marribu hali do.

2.      Haleaon, insakhinsak, reherehe, tijur pe.
Tali dohot pastappastap, tung ditaonhon Ho sude.
Paluahon au na pogos, sian tangan ni sibolis.
Alani hupuji Ho, tung marribu hali do.
..................musik..................
3.      Bugang sada tanggurungmu di na hona linsing  i.
Hamamalum ni bugangku na di rohangki do i.
Ho do gabe binuraan au dapotan hangoluan.
Ala ni hupuji Ho tung  marribu hali do.

4.      Sungsang duri ditumpalhon panginsahi i tu Ho.
Jala tolong dilibashon tu uluM, pasiak Ho.
I ditaonhon Ho, Tuhanku, ala ni hajungkatonku.
Ala ni hupuji Ho tung marribu hali do.
..................musik..................
5.      Tung tanganMu dohot patMu ditorusi labang i.
Jadi tiris ma mudarMu sian hau parsilang i,
I do mual paridian di au jolma na hansitan.
Ala ni hupuji Ho tung marribu hali do.

6.      Sai pinuji ma GoarMu ala ni na bernit i.
Dohot ala ni mudarMu Jesus na nilehonMi.
Lao pasaehon dosanami asa unang mago hami.
Ho hupuji ala ni salelenglelengna i.

20. J a m i t a  : Rom 11: 33-36 ; 12: 1-8
           
21. Marende SDJ. No. 623 : 1 ............ Ndi di dolok adui   Bl. 387
     (Papungu Pelean : 1. Pusat + 1. P2SP)
        
1.      Tarsilang Ho, manobus au, tung longang rohangki,
MudarMu na badia i, manesa dosangki.
..................musik..................
2.      Ndang na tarasam balga ni, holong ni rohaMi,
Durus mudarMu Tuhanki, ala ni dosangki.
..................musik..................
3.      Hulehon ma Tuhan tu Ho, saluhut diringkon,
Lao mangoloi Ho Tuhanki, saleleng ngolungki.
..................musik..................

22. Tangiang/Ende Pelean, Ale Amanami..............Pasupasu.

23. Dung mangulon 15 minut, udutan ma tu Ulaon Na Badia.
24. MARULAON NA BADIA

1.      Marende BE. No. 179:1-2 Adong do sada mual  BL. 20

1.   Adong do sada mual i, di na mardosa i
     Mansai denggan do mual i pasonang rohangki
2.   Aek mual na badia i, ima di Jesus i.
     Disesa do tihasta i, dibuat arsak i.

2.    Pangaradeon

3.    Marende BE. No. 152: 1 Jesus Namamorsan BL. 120


            Jesus na mamorsan dosa ni portibi on, pangolu hami.
Jesus na marmosan dosa ni portibi on, pangolu hami.
Jesus  na mamorsan dosa ni portibi on, sai pasonang hami,
Amen, Amen, Amen.

4.    Manjaha Tona Ulaon Na Badia

5.    Marulaon na badia

a. BE. No. 153: 1...O Jesus, naung sineat              BL. 126

1. O Jesus, naung sineat di hau na pinarsilang.
      Roham tongtong daulat, nang uju Ho tarhilang.
       Marutang hosa hami, ditaon Ho dosanami. Asi roham o Jesus.
2.    Pelean na Badia, na masuk tu Jahowa,
       Singkat ni manisia, na so daulat roha.
       Ditaon Ho dosanami, so i, lao mago hami. Asi roham o Jesus.
            3.    Pelean na badia, jinalo ni Debata,
                   Panaon ni manisia, na pasohothon bada.
                   Sai sesa dosanami, Ho hatigorannami, asi roham, o Jesus.
4.    Pelean na badia, dagingmu sipanganon
       di angka na porsea, mudarmu siinumon.
       Sai ro ma maringanan marhite parpadanan di hami on, o Jesus.
               
     b. BE. No. 227: 1...       Jesus ngolu ni                      BL.  26

            1.   Jesus ngolu ni tondingku, Ho do haporusanki.
                  Gok di Ho ma diringku ro di nasa langkangki.
2.   Lam tangkas ma patuduhon tu au on pangkophopmi,
      asa i huhalungunhon hot ma au di    lambungmi.
3.   Jangkon au baen siseanMu, na girgir tu podaMi.
      Sai surdukkon ma tanganmu asa tong hutiop i.
4.   Tangkup au Jesus Tuhanku tiop au mansai gomos
      Asa unang runsur pathu sian dalan na tingkos.
5.   Raphon Ho do au mangalo dosa dohot hisaphi
Ai sumurut do pangago anggo Ho di lambungki.
6.   Tondimi sai tong paian di au on tinobusmi.
Tung patau ma au manean pinarbagabagami

    c.  BE. No. 176: 1... Na mungkap do surgo             BL.  3

1.   Na mungkap do surgo, dibaen aha do ?
      Dibahen naung ro Jesus mangungkap di ho (2x).
2.    Dosam do tinaonNa di Golgata i,
Disi dipasae do sude utangmi (2x).
3.   Antong o tondingku, tu Jesus ma ro,
Ai las do rohana manjangkon nang ho (2x).
4.    Tarsongon hasumba rara dosami,
Sesaon ni mudar ni Jesus do i (2x).
5.    Roham mangkolsohon parsorionmi,
   Tu Jesus pasahat sude arsakmi (2x).
6.    Neang bahenonna na hansit sude,
       Basar ho di togu tu surgo muse (2x).
7.    O Jesus sai Ho do parjambaranki,
       Pasonang rohangku, pasabam ma i (2x).

    d.  BE. No.  178: 1... Ro ma tu Jesus                         BL. 196

1.   Ro ma tu Jesus ro ma tibu bege hatana, jangkon burju.
Na ro do Jesus pangolu ho, asal porsea ho.
Mansai las rohanta i muse, molo ias sian dosa pe.
Sai ro ma hita tu surgo, laos sonang ma disi.
2.   Ro ma tu Jesus undukkon ma pambahenanmu na so tama,
Naeng sesaonna  do dosami dibaen mudarna i.
Mansai las rohanta i muse.....
3.   Ro ma tu Jesus hatop ho ro ai so ditulak Jesus be ho.
Na asi roha do Jesus i, sai pos ma rohami.
Mansai las rohanta i muse...
4.   Ro ma tu Jesus na holong do rohana i di halak na ro
Ai dipalua tondinta i unang be mago i.
Mansai las rohantai muse...

 e. BE. No. 155: 1... Naung moru do muse sataon    BL. 192

1.   Tuson ma ho ale tondingku, di na mauas male ho.
Manjalo basa ni Tuhanmu, pinaradeNa i di ho.
Dilehon Jesus do dagingna marhitehite roti on,
Dilehon dohot do mudarna marhitehite anggur on.
2.   Ai nang tongtong pe ganup ari mudarna mangurasi au,
Huhut Ibana so mansadi manogu tu lambungna au,
Sai naeng au mangan parpadanan ni Jesus Kristus,
Tuhanki, na padamehon parbadaan, na pasonangkon rohangki.
3.   Asi roham di au, o Jesus tumpahi au sadarion
Ai hatami do hupatulus, manganhon parpadanan on.
Antong patiur ma rohangku marningot denggan ni basam
I ma na tinaonmi dosangku binaen ni holong ni roham.
4.   Patogu haporseaonku di hasasae ni dosangki
Marsitiopan baen rohangku di mudarmi na durus i.
Sai ro ma Ho ale Tuhanku marhite parpadanan on,
Jorom ma baen nuaeng rohangku, Ho ma nampuna au tongtong.

f. BE. No. 183: 1... Na jumpang au       BL.105

1.   Na jumpang au na asiroha di au naung mago i hian,
Tuhan Jesus parasiroha di au na lilu nahinan.
Nuaeng hutanda Tuhanki parasiroha bolon i, parasiroha bolon i.
2.   Dibahen godang ni dosangku tung hona uhum au tama,
Hape ro Jesus dipadomu au muse dohot Debata.
Mudarna na badia i pajongjong pardomuan i, pajongjong pardomuan i.
3. On pe holan asi ni roha sipangasahononhon i.
Sipujionku do Jahowa, dung ro na pamanathon i.
Unduk huhut las rohangki, mamuji asiroha i,mamuji asiroha i.
4.   Ianggo i ndang taragohon baenon ni manang aha pe.
Sai asimi hupangasahon di tangiangku sasude.
Mate pe au, pos rohangki, marningot asiasimi, marningot asiasimi.     
5.   I pe, ale Tuhan Jahowa, unang unsati asimi.
Boan ma au, ale Debata, dung mate au tu lambungmi.
Tongtong las rohangki disi, mamuji asiasimi, mamuji asiasimi.

g.   BE. No. 179: 1... Adong do sada mual             BL.20

1.   Adong do sada mual i di na mardosa i;
      Mansai denggan do mual i pasonang rohangki.
              2.   Aek mual na badia i, i ma di Jesus i,
                    Disesa do tihasta i, dibuat arsak i.
3.   Ai mudar ni Tuhanta i do mual i sintong,
      Durus di Golgata do i, manghophop hita on.
              4.   I ma tutu, ai dohot au las dibahen Ho,
                    Asi do rohami di au, nang di luhut na ro.
 5. Parjahat di siamunmi,di dolok Golgata,
      Digolom i do hatami,dibaen porsea do.
              6. Dung i jalo malua i sian pangago i,
                   Dibaen porsea roha nii di Ho, Rajanta i.    
              7.   Sai dohot au palua ma, padao ma jea i.
                    Di hami sai patongtong ma haporseaoni.
              8.   Ai na margogo do tongtong mudarmu na use;
                    Ias dibahen rohangkon, bontor huhut ture.
              9.   Dibahen i pujionki tongtong ma goarmi.
                    Sai i ma sogot endengki, dung au di lambungmi.
               
h.  BE. No. 435: 1...  Marolopolop tondingki       BL.294.

              1.   Marolopolop tondingki, ai naung ditobus Jesus i.
                    Hamu sude, bege ma i, sai las rohangku mandok i.
                    Sonang ni tingki i, dung jumpang Jesus Tuhanki.
                    Tondina mangajari au, tarbaen marlas ni roha au.
                    Sonang ni  tingki i, dung jumpang Jesus Tuhanki.
2.   Dihaol holongna rohangki, tung na so boi be mago i.
      Matana do manatap au, Pinggolna tumangihon au.
      Sonang ni tingki i ............
              3.   Tu Jesus sahat ngolungki. Saleleng ni lelengna i.
                    Rap dohot au endehon ma. Endengku na imbaru, da.
                    Sonang ni tingki i ............
              4.   O, rohangki, sai tahan ma, Sitobus ho,
                    Ihuthon ma. i ma tutu, nang mate ho, tu surgo do ditogu ho.
                    Sonang ni tingki i .........

      i.      BE. No. 424: 1...  Soara ni Tondi    BL.284.

1.    Soara ni tondi ni Tuhanta i jotjot dilaosi, ditulak ho i.
Sai tanda jeamu, pauba roham, dapothon Tuhanmu, sisesa dosam.
2.    Marunduk ni roha topoti sude,
Pambaenmu na torbang, jengkelmu sude,
Pasahat tu Jesus sandok dirimi.
Sai tong pasunggulhon pangkophopNa i.
3.    Tangihon hataNa, parguru ma i, rajumi ruasmu ginomgomNa i.
Pangido: Sai lehon tu au tondiMi, Pargogo, mangula sandok lomoMi.
4.    Tarsor ho mardosa, manurut lomom,
Tung unang datdati, sai alo langkam.
Dompakkon Tuhanmu, Pargogo do i, Manesa, pamalum sude dosami.
5.    Sai tiop tanganNa, pangido ma on: Ramoti padungo, au siseanMon,
Pasada rohangku manggolom tongtong.
Hatamu na sintong, patogu au on.

      j.      BE. No. 251: 1...  Na monang i do   BL.138.

1.       Na monang i do na muse manganhon parbue ni hau hangoluan i,
Ndang jadi idaonna hamagoan nang hamatean paduahon i;
:,:Ai debatana papos rohana, mambaen langkana tongtong tiur.
2.       Na monang i ndang tupa hahuaon ni hamatean paduahon i;
Sai jongjong do Ibana maradophon bohingku di banuaginjang i,
sai idaonna disi Tuhanna :,: Ro di donganna na monang i.
3.       Na monang i do lehononku mangan di surgo manna na buni dope;
Pangalahona do tongtong ingoton, margoar na imbaru do muse,
Na sinurathon tu batu intan. :,: Tongtong martua panjalo i.
4.       Na monang i marnida pambaenanKu, i do na marmahani bangso i;
PasahatonKu deba sahalangKu tu tangan ni sude na monang i;
Sai rosahanna muse alona, :,: Patunduhonna do musungki.
5.       Na monang i do na manjalo ulos na saksak di banuaginjang i
Goarna i do na so jadi mosos sian pustaha hangoluan i
Taringotanku di Debatangku :,: Sude donganku na monang i.
                               
      k.     BE. No. 449: 1...  Sai solhot tu silangMi        BL.300.

1.       Sai solhot tu silangMi, Jesus Ingananku.
      Mual na mabaor disi, i ma i nu mon ku
SilangMi, Tuhanki i ma pujionku,
Paima sogot sahat au, i endehononku,
2.       Lao ma au  tu  silangMi, i  haporusanku.
Sai asi ma rohaMi unang tulak ahu. SilangMi..............
3.       Domu ma tu silangMi, i ma tioponku.
Asa unang lilu au, Ho ihuthononku. SilangMi..............
4.       Laos maniop silangMi sai paimaonku
GokkonMi tu surgo i, tu siteanonku. SilangMi............

25. LITURGI  PANGUJUNGI  (jongjong)

a.    Marende BE. No. 9: 1 Hupuji holong BL. 110

Hupuji  holong ni rohamu, O Tuhan Jesus Rajangki.
Tu Ho hulehon ma tondingku, ai i do pinangidomi.
Huhalupahon ma diringku, mamingkir holong ni rohamu.

b. Tangiang Pujipujian

U :     Puji ma Tuhan Debata ale tondingku, jala nasa rohangku di bagasan mamuji GoarNa na badia i. Puji ma Tuhan Debata, ale tondingku, jala unang tung halupahon denggan ni basana sudena. Ibana do manesa dosam sudena, jala Ibana pamalum angka sahitmu sudena! Ibana paluahon hosam sian hamagoan, jala dilehon tu ho denggan basa dohot asi ni roha! Parasiroha jala pardengganbasa do Tuhan Debata, lambat tarrimas jala parasiroha godang!
    H   :   (mangendehon) BE. No. 149: 3  Ho tongtong ihuthononku  BL. 182
Manang aha pe na masa, las ni roha arsak pe.
Tioponku Ho na basa, na marholong roha pe.
Tung saleleng au mangolu, nang dung suda bohalhi.
Ingkon Ho o Sipangolu, pujionku sai tongtong.
  U  :  Ndang dibahen tu hita hombar tu dosanta, jala ndang dibaloshon tu hita hombar  tu hajahatonta! Songon asi ni roha ni amaama tu anakhonna do, asi ni roha ni Tuhan Debata di angka na manghabiari Ibana! Nunga tangkas dipatuduhon Debata holong ni rohaNa i tu hita, di na mate Kristus humophop hita uju pardosa dope hita. Antong nda lam malua ma hita nuaeng sian rimasNa, dung gabe parpintor hita hinorhon ni mudarNa i? Dibahen i sai pujion ni pamanganku dohot rohangku dohot nasa pambahenanku do Tuhan Debata olat ni on ro di salelenglelengna;
    H  :    Sai pujionku do Tuhan Debata, Amen!
    U  :    Dipasupasu ...
    H  :   (mangendehon) : Amen, amen, amen.

26. MASIJALANGAN  (Huhut mangendehon)
BE. No. 435: 1 Marolopolop tondingki   BL. 294.

              Marolopolop tondingki, ai naung ditobus Jesus i.
              Hamu sude bege ma i, sai las rohangku mandok i.
              Sonang i tingki i, dung jumpang Jesus Tuhanki.
              TondiNa  mangajari au, tarbaen marlas ni roha au.

              Sonang ni tingki i, .........











NEXT:
Tata Ibadah HKBP ACARA PARTANGIANGAN BUHABUHA IJUK - Minggu, 05 April 2015


PREV:
Mengenal Liturgi (Tata Ibadah) HKBP

All Tata Ibadah HKBP
 (99)
Filipi 4:1-9 (1)
Matius 22:34-46 (1)
Mazmur 145:1-8 (1)
Roma 12:9-21 (1)
Roma 14:1-12 (2)
Yehezkiel 33:7-11 (2)
Yesaya 51:1-8 (1)

NEXT:
Tata Ibadah HKBP ACARA PARTANGIANGAN BUHABUHA IJUK - Minggu, 05 April 2015


PREV:
Mengenal Liturgi (Tata Ibadah) HKBP

Renungan HKBP 2026
Minggu, 28 Juni 2026
Jamita HKBP Minggu, 28 Juni 2026 - Holong Na Manghorhon Las Ni Roha Dohot Gogo (Kasih yang mendatangkan sukacita dan kekuatan) - Filemon 1:4-7
Minggu, 21 Juni 2026
Jamita HKBP Minggu, 21 Juni 2026 - Pemeliharaan Allah Yang Universal - Kejadian 21:8-21
   popular pages    |    login    | e-mail: admin@lagu-gereja.com    Lagu-Gereja - FB    © 2012 . All Rights Reserved.

Kostenlose Backlinks bei http://backl.pommernanzeiger.de Seitenpartner www.condor-bbs.com Rankingcloud.de - Hosting in der Cloud Suchmaschinenoptimierung Kostenloser Auto-Backlink von www.cheers2.de